Aiaraldeko talentu musikalak Amurrio Antzokian egingo du bat, datorren urtarrilaren 25ean ospatuko den Aiaragazte Music Fest jaialdiaren lehenengo edizioan. Jaialdia antzokiaren XX. urteurrenerako prestaturiko programazioaren barruan kokatu dute, eta 4 Bancos, Gwa Ya, Belgorri, Matx eta Deriba taldeak batuko dira eszenatokian.
Bi ordu baino gehiagoko musika emanaldia izango da. Banda bakoitzak 20 minutuko emanaldia eskainiko du, eta kontzertu tartean musika-jartzaileak eta "sorpresak" egongo direla aurreratu dio Alex Yarza 4 Bancos taldeko kideak Aiaraldea Komunikabideari. Jaialdia 20:00etan hasiko da, eta sarrerak salgai daude honezkero Amurrio Antzokiaren web orrian, 6 euroren truke.
Aiaraldeko artistak taulara
Eskualdeko musika banden topaleku izango da Aiaragazte Music Fest jaialdia. Aiaraldean hainbeste musika talde egotea "albiste ona" dela azaldu du Alex Yarzak, eta banden "gaztetasuna" azpimarratu du. Musika jaialdi handiak boladan dauden garaian, tokiko musikariak babestu eta sustatzeko beharra aldarrikatu du 4 Bancos taldeko bateriak. Gauzak horrela estilo eta erritmo anitz entzungo dira urtarrilaren 25ean Amurrio Antzokian, baina guztiak Aiaraldeko sor-markaren pean.
4 Bancos taldeak rap eta rock doinuak elkartuko ditu 2019an abaitutako ibilbidetik tiraka. Talde amurrioarra estudiora sartuko da apirilean, disko berria grabatzeko asmoz, eta, Aiaraldea Komunikabideari aurreratu diotenez, hainbat aurrerapen kanta taularatuko dituzte Aiaragazte jaialdian.
Matx Katarsia EPa aurkeztu zuen toki berera itzuliko da. Bakarlari laudioarrak Amurrio Antzokia aukeratu zuen bere lehenengo EPa taularatzeko 2023an. Orduko hartan, 4 Bancos taldeko lagunak izan zituen inguruan, eta Aiaragazte Music Fest jaialdian ere gertu izango ditu.
Gwa Ya izango da jaialdiko talderik beteranoena. 2012an bi lagunen artean sorturiko reggae eta ska banda da Gwa Ya, eta honezkero ibilbide oparoa erdietsi dute musikaren munduan. Bi disko kaleratu dituzte, eta 2021ean plazaratu zuten azken kanta, bideoklip eta guzti:
EPa estreinatu berri duena Deriba taldea da: Esnatu. Amurrioko eta Urduñako lau gaztek osatzen dute Deriba rock banda, eta irailean sartu ziren estudiora, urte berriarekin batera plazara atera duten lau abestiz osaturiko lana grabatzera.
Belgorri da jaialdiko kartela osatzen duen azken taldea. Hauek ere EP berria grabatu dute berriki: Ernetzen. 2024ko apirilean grabaturiko Lehen Taupadak EPari segida eman diote amurrioar gazteek, lau abesti berriz osatutako lan honetan.
Aiaraldea Komunikabideak zuzenean eskainiko du jaialdia.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!