Gizon bat atxilotu du Guardia Zibilak Amurrion, sare sozialetan mezu iraingarriak argitaratzea egotzita. EFE agentziak azaldu duenez, Guardia Zibileko bi agenteren heriotzaz barre egitea leporatu diote atxiloturari. Ez dute zehaztu zer sare sozialetan egin zituen adierazpenak, baina nabarmendu dute 4 milioi jarraitzaile baino gehiago zituen kontu batean egin zituela.
4 milioi jarraitzaile baino gehiago zituen kontu batean egin zuen atxilotuak iruzkina, Guardia Zibilak nabarmendu duenez.
Institutu armatu espainiarrak zehaztu duenez, 2024ko martxoan jazotako gertakari bati lotuta dago atxiloketa. Hilabete horretan Guardia Zibileko bi agente hil ziren AP-4 errepidean, Los Palacios (Sevilla) parean, kamioi batek harrapatuta. Ezbehar horren harira, honakoa idaztea egotzi diote atxilotuari: "Polizia hila, baratzerako ongarririk onena".
Ikerketa, "dei anonimo baten bidez"
Maiatzean abiatu zuten ikerketa, iruzkin hori salatzen zuen dei anonimo bat jaso ostean Castellóko (Valentzia) Guardia Zibilaren kuartelean. Ikertzaileek sare sozialaren profilaren titularraren benetako nortasuna ikertu zuten, eta Amurrion topatu zuten.
Azaldu dutenez, Amurrioko epaitegiaren esku utzi dute kasua. Irain delitua egotzi diote atxilotuari.
