Laster ikusi ahalko da Endika Diazen ‘Arde la Niebla’ erakusketa. Argazkilari amurrioarrak Urduñako portuan 1962an gertatutako istripua dokumentatu du. Konpostela Orkestrako kideen mikrobusa portuaren lehen bihurgunetik behera erori zen urte hartan, eta lau musikari hil ziren.
Gertakari hori baliatu du Diazek bere proiektua hezurmamitzeko, portua “oroimenetik eta emoziotik” arakatuz eta inguruan oraindik dauden istripuaren aztarnak dokumentatzeko. Euskal Herria Argazkia.Eus sariketa irabazi zuen iaz Aiaraldeko argazkilariaren lanak.
“Endika Diazen lanak dolua, beldurra eta espazioen energia bezalako gaiak sakontzen ditu, errepidea bizitzaren metafora indartsu gisa erabiliz”, nabarmendu du Udalak, “gainera, bi herrik, euskaldunak eta galegoak, gertakari tragiko honekin bat egiten duten nahigabeko topaketa jasotzen du erakusketak”.
Erakusketaren eta katalogoaren testuak ere amurrioar batek sortu ditu: Andere Larrinaga Cuadrak, Euskal Herriko Unibertsitateko Artearen eta Musikaren Historia Saileko irakasle eta Arte Ederren Fakultateko Kalitate eta Berrikuntza dekanordeak.
Bi amurrioarrak egongo dira martxoaren 7an egingo den inaugurazioan. Hogei egunez egongo da erakusketa La Casonan ikusgai, 27ra arte, espazioaren ohiko ordutegian:
- Asteartetik ostiralera: 10:00-14: 00 eta 17:00-19:00
- Larunbat, igande eta jaiegunetan: 10:00-14:00
