Mirari Gotxik jarraitzen du palmaresa handitzen. Pasa den astean Santoñan irabazi zuen lasterketa eta martxoan Arabako Txapelduna izan zen junior kategorian.
Pasa den asteko garaipenari dagokionez, ibilbide laua eta haizetsua izan zuen, ihesaldi saiakera ugarirekin. Hasieran aurreratu zen taldetxoan sartu ez bazen ere, amurrioarrak lortu zuen buruan jartzea hirugarren biran. Hiru kilometro baino ez zirenean falta lasterketa amaitzeko, erasora jo zuen Gotxik eta helmuga berak bakarrik zeharkatu zuen, minutu bat baino gehiagoko aldearekin, gainera.
Ez da hori izan aiaraldearraren emaitza positibo bakarra. Duela bi asteburu bosgarren izan zen Balmasedan eta maiatzaren 4an Legution laugarrena bere kategorian. Postu horrekin Arabako txapelduna izatea lortu zuen.
Garaikurrak meritu handia izan zuen. Izan ere, Gotxik istripua izan zuen Pontevedran. Lasterketa batean lehiatzen ari zela, Guardia Zibilaren motor baten kontra jo eta kolpe larria pairatu zuen. Oraindik ere guztiz osatu ez bada ere, berriz lehiatzeko hautua hartu du amurrioarrak. "Prozesu luzea behar da guztiz sendatzeko, baina egia da ezin naizela kexatu", adierazi dio Aiaraldea Komunikabideari.
Atsedenik ez
Printzipioz, gaurdanik igandera bitartean erronka handia izango du Gipuzkoako Itzulian. "Hiru etapa dira guztira, erlojupeko bat eta 90 kilometroko bi etapa nahiko gogorrekin", azaldu du kirolariak. Halaber, Sopelan egingo den Euskadiko Txapelketan ere arituko da.
Isptripuak istripu, denboraldi bikaina egiten ari da Gotxi, eta horrek saria izan zuen urte hasieran, Movistar talde profesionalak entrenatzera gonbidatu baitzuen.