Arabako Foru Aldundiak jakinarazi du Amurrioko San Anton Armuru nagusientzako egoitza berritzeko eta handitzeko obren lizitazio berria prestatu duela, 1.735.572 eurokoa, hain zuzen. Izan ere, aurreko deialdian ez zen enpresarik aurkeztu.
Guztira, %25eko igoera egin dute hasierako kopuruarekin alderatuta, eta sei hilabeteko epea egongo da gauzatzeko, zuinketa egiaztatzeko akta
formalizatzen den egunetik aurrera.
Aldundiak azaldu duenez, "gaur egungo egoiliarrek 1990ean zentroa eraiki zenean baino mendekotasun handiagoa dute, mugikortasun arazo gehiago dituzte eta eremu irekiagoak behar dituzte joan-etorriak errazteko".
Langileek eurek salatu dute eraikina ez dagoela egokituta eta ebakuazio arrapala ezinbestekotzat jotzen dutela.
Obraren helburuak
Amurrioko egoitzaren obrak (39 plaza ditu) beheko solairua handituko du hegoaldean.
Horrela, egongela-jangela zabalagoa izango da, eta sarbide nagusiaren ondoan espazio berri bat sortuko dute, bisita gela izateko egungo beharrari erantzuteko.
Era berean, zirkulazio eta komunikazio espazioak berrantolatuko dira, gelei erosotasun eta pribatutasun handiagoa emanez. Sukaldearen eta egongela-jangelaren arteko zuzeneko lotura berreskuratuko dituzte, eta igarobide atari berri bat sortuko da.
Handituko duten zatiaren sabaiari esker, terraza bat sortuko da lehenengo solairuan.
Lekuz aldatu edo egokitu behar diren espazioak berrantolatuko dira, hala nola ile apaindegia eta podologia, errehabilitazio gela, bulegoa eta bilera gela. Beheko solairuan bateratuko dira horiek guztiak.
Gainera, oraingo igogailu hidraulikoaren ordez beste igogailu mekaniko bat jarriko dute, eta beheko solairuko komunak indarreko irisgarritasun araudira egokituko dira. Era berean, eraikinaren eraginkortasun termikoko baldintzak hobetuko dira. Guztira, 300 metro karratukoa izango da handituko duten azalera.