Oharra plazaratu zuen atzo Tubos Reunidos Groupek urteko lehen sei hilabeteen berri emateko. Izan ere, taldeak adierazi du muga-zergen ondorioz 28,4 milioi euroko galerak izan dituela. Horrek eragin zuzena izango du langileenga. Iza ere, irailaren 1etik otsailaren 28ra bitartean lanaldia murriztu beharko dute, pasa den astean adostu bezala.
Berez, enpresak azaldu du negozio kopuruak gora egin duela %19an iazko emaitzekin alderatuta, baina Donald Trump Estatu Batuetako presidenteak ezarritako %50ko muga-zergek 28,4 milioi euroko galerak eragin dituztela; alde batetik, zergak ordaindu behar izan dituztelako eta, bestetik, bezeroen erosketak gelditu dituztelako, eskarien zorroa %26 murriztuta.
Horrez gain, zergen politikak dolarraren balio urratu duela azpimarratu du Tubos Reunidos Groupek. Edonola ere, "sektore ziklikoa" dela ziurtatu dute konpainiako arduradunek eta "moteltze fase batean" daudela uste dute.
Aldi Baterako Erregulazio Espedientea
Gauzak horrela, Amurrion kokatutako enpresak iragarri du Aldi Baterako Erregulazio Espedientea jarriko duela indarrean irailaren 1etik aurrera. Gehienez %50eko eragin izango duela aurreratu du.
Aiaraldea Komunikabideak pasa den astean argitaratu zuen langileen eta konpainiaren arteko akordioa lortu zutela espedientea egikaritzeko eta beharginek hainbat osagarri izango dituztela horren ondorioz.
