Endika Diazek urrats berria eman du Arde la niebla lanarekin eta liburua bihurtuko du orain arte erakusketa izan dena. Duela urtebete baino gutxiago Argazkia.eus lehiaketa irabazi zuen eta aitortza horrekin ekin zion erakusketa egiteari. Baina orain beste euskarri batean aurkeztu nahi du argazkigintza zein ikerketa obra. Horretarako, hain zuzen, zabaldu du crowfundinga hemen.
Liburuak 86 orrialde izango ditu, 15x20 zentimetroko tamaina eta azal gogorra.
Berez, Jaime Narvaez diseinatzailearekin eta Gustavo Bravo Jardín Remoto eskolako zuzendariarekin aritu da elkarlanean proiektua egikaritzeko eta, gainera, Dolores Vazquez Vilameak idatzi du hitzaurrea. Gogoratu beharra dago Arde la nieblak 1962an Urduñako mendatean orkestra galiziar batek izandako istripu lazgarria lantzen duela eta aipatutako emakumea dela, hain zuzen, ibilgailuaren gidariaren alaba.
Hainbat aukera
Ekarpen ekonomikoa egiteko interesa dutenek jakin behar dute aukera anitzak izango dituztela. Egileak horretarako beta eskaini du eta, adibidez, liburua eskuratu nahi ez dutenek, baina laguntzeko gogoa daukatenek, 10 euroko dohaintza egin dezakete. Orain arte arrakasta gehien izan duen eredua Behelainoa izan da, 30 euroren truke liburua eskuratzeko eskubidea ematen baitu.
Edonola ere, 50, 70 edota 150 euroko trukeak egiteko parada dago. Modalitate bitxiena 350 eurokoa da, eta argazkigintza talde eta elkarteei bideratuta dago. Liburuaren hiru ale ez ezik, hitzaldia jasotzeko eskubidea ere ematen du.
Epeak
Crowfunding kanpaina 38 egunez luzatuko da eta egilearen asmoa da irailean eta urrian maketazio eta edizio lanak burutzea azaroan inprimategira bidaltzeko. Abenduan egingo du aleen banaketa. Crowfunding barruan argitaratuko ez diren liburuek 40 euroko prezioa izango dute.
