Amurrio Antzokia hautatu du Fedeafesek Buru Osasunaren Nazioarteko Eguneko aurtengo bere ekitaldi nagusia egiteko. Buru osasuna sustatzen duten lau elkarte barnebiltzen ditu federazio horrek, eta horietako bat da Asasam, Aiaraldean esparru horretan jarduten 36 urte daramatzan taldea.
Atzo eguerdian egin zuten ekitaldia eta, elkarteetako kideez gain, ordezkari instituzional ugari ere gerturatu ziren zitara. Aldarri bateratu argia plazaratu zuen federazioak bertan: buru osasuna zaintzeko ez dela inoiz beranduegi, ezta goizegi. Bide horretan, gai horri "bizitzako etapa guztietan" erreparatu behar zaiola jarri zuten mahai gainean.
Atzoko ekitaldiarekin hasiera ofiziala eman zaio aurtengo Buru Osasunaren Nazioarteko Eguna dela eta eskualdean antolatutako egitarauari. Datorren urriaren 14an lagunarteko futbol partida egingo dute Asasameko erabiltzaileen eta La Milagrosako ikasleen artean. Hilaren 19an, aldiz, Buru Osasunaren aldeko ibilaldi sozialaren VI. edizioaren txanda izango da. Ohiko funtzionamendua izango du egitasmo horrek. Goizeko hamarretan abiatuko dira parte hartzaileak Laudio zein Amurriotik, Luiaondon elkartzeko.
Argazkiak: Aimar Gutierrez Bidarte
