Baranbioko euskaldunen egutegian gorriz markatutako eguna da urriaren 25a. Izan ere, Euskal Jaiaren beste edizio bat ospatuko dute larunbatean, ohi bezala, Garrastatxuko baselizan. Herriko euskaldunen topaleku bilakatu da festa, “erdararen interferentziarik gabe bizitzeko eguna”, antolakuntzan dabilen Beiliki euskara elkartearen hitzetan. Aurtengoa jaiaren hogeita zortzigarren edizioa izango da.
Antzerkia eta bertsoak
Aimara antzerki talde amateurraren obra berriarekin emango diote hasiera egitarauari. Antzerki taldeak Altuna jaunaren hilketa lana estreinatu zuen iragan astean Urduñan, eta bere bigarren emanaldia ikusteko aukera egongo da Garrastatxun larunbatean, 12:30ean. Serapio Lopez, Jon Gerrero, Virginia Garcia, Marian Fradejas eta Ainhoa Isasi tokiko antzezleak igoko dira oholtzara, Julio Cortazar idazlearen testuaren moldaketa erakusteko.
Antzezlanak trikipoteoari eta bazkariari emango die bide. Bazkaltzeko marmitakoa, albondigak, pantxineta, kafea eta kopa eskainiko dituztela aurreratu dute antolatzaileek.
Eguneko ekintza nagusia bazkalostearekin batera iritsiko da: Julio Sotok eta Oihana Bartrak eskainiko duten bertso saioa.
Ospakizunari amaiera emateko Gauargi erromeria igoko da Garrastatxuko baseliza aurreko zelaian jarriko duten eszenatokira, festa-giroa ordu txikiak arte luzatzeko.