Dozenaka lagun bildu ziren asteazken arratsaldean Amurrioko Juan Urrutia plazan eginiko elkarretaratzean. SOS Aiaraldeak deitu zuen mobilizazioa, ordu batzuk lehenago herriko auzitegian egondako epaiketa bat salatzeko. Hain zuzen, Aiaraldeko bizilagun bat epaitu zuten goiz hartan, akusazio batekin: iragan maiatzean Amurrioko familia bat etxegabetzen saiatu zen Ama Desokupa enpresari aurre egitea.
Horren aurrean, desokupazio enpresei beti aurre egingo dietela ziurtatu zuten arratsaldeko elkarretaratzean. “Gure elkartasunik beroena adierazi nahi diogu epaitua izan den kideari, eta aldi berean desokupazio enpresen kontrako borrokaren kriminalizazioa salatu nahi dugu”, aldarrikatu zuten plazan.
Plazan ziurtatu zutenez, Ama Desokuparen etorrera eragin zuen etxebizitza gatazkan inplikatutako pertsona guztiek “bizitoki-alternatiba” bat dute une honetan, “eta ez daude kalean amaitzeko arriskuan”.
Nabarmendu zutenez, “arazo orokortua” da etxebizitzarena: “langile-klaseak bere soldataren zati gero eta handiagoa bideratu behar du etxebizitza ordaintzera, beste batzuk horren kontura aberasten diren bitartean”. Horrekin batera, salatu zuten etxebizitza bat lortzeko baldintzak geroz eta “eskuraezinagoak” bilakatzen ari direla eskualdean, eta are gehiago pertsona migratuen kasuan, “pairatzen duten arrazismo inmobiliario orokorra” dela eta. “Horrek familia asko etxebizitza partekatuetan edo azpierrentetan bizitzera behartzen ditu, horrek dakartzan ondorio guztiekin”, ohartarazi dute SOS Aiaraldeako kideek.
Etxebizitza alternatiba bermatuta
Asteazkeneko epaiketa eragin zuen kasuari buruzko hainbat xehetasun ere azaldu zituzten elkarretaratzean, eginiko borroka goraipatuta: “Desokupazio enpresa bat izan dugu gure herriko bizilagunak mehatxatzen, baina mehatxu horiei erantzuten jakin duen komunitate bat ere izan dugu, desokupen aurrean antolatu dena. Baina ez hori bakarrik, baita gatazka honetan eta bizitoki-premiari irtenbideak bilatzen inplikatu dena ere”.
Eginiko lan horrek emaitzak izan ditu, SOS Aiaraldearen hitzetan. Plazan ziurtatu zutenez, Ama Desokuparen etorrera eragin zuen etxebizitza gatazkan inplikatutako pertsona guztiek “bizitoki-alternatiba” bat dute une honetan, “eta ez daude kalean amaitzeko arriskuan”. Eta hori Ama Desokupa gabe lortu dela azpimarratu zuten elkarretaratzean, desokupazio enpresa “faxista eta parapolizial” hori “tentsio handiagoa” sortzera mugatu dela nabarmenduta, “berez konplexua eta delikatua zen gatazka batean”.
Bukatzeko “etxebizitzarekin aberasteko asmoz negozioa egiten duten errentatzaileen aurrean antolatzeko” deia luzatu zuten elkarretaratzean, “egoerari buelta emateko ordua” dela argudiatuta.