Olentzerok aurpegi berria izango du aurten Amurrion. Manolo Plazak berrogei urtez gorpuztu du ikazkinaren papera eta iaz iragarri zuen erreleboa emateko nahia. Agurra jakinarazi zuenetik Olentzero berria bilatzeko lanetan murgilduta egon dira Ohiturak Elkarteko kideak. Gaiak ikusmira handia sortu du herrian, eta ugariak izan dira azken urte honetan zabaldutako zurrumurru eta susmoak.
Bada, misterioa argitu berri dute. Xabier Berganza 35 urteko amurrioarrak hartuko du Plazaren lekukoa aurten. Sare sozialetatik zabaldutako bideoan eman dute erabakiaren berri.
Oraindik ez dute zehaztu zenbat urtez jantziko duen txapela Berganzak, baina Ohiturak Elkartetik aurreratu dute Olentzeroren papera denbora gutxian txandakatzen joatea dela hasierako asmoa.
Agenda bizia
Zirraraz beteriko egunak datoz Amurriora, eta Olentzero berriak abenduaren 13an ekingo dio agenda publikoari. APDEMA elkarteari egingo dio bisita ikazkinak egun horretan. Abenduaren 20an Ene Kantak ikuskizunean egingo du agerpena, Bañueta Kiroldegian. Hitzordurik bereziena abenduaren 21ekoa izango da; Olentzero Goikomendira igoko da eta bertan egingo die harrera herriko haurrei. Abenduaren 23ko arratsaldean eskutitzak jasoko ditu GUK eskulturan. Azkenik, abenduaren 24an ohiko kalejiran bidelagun izango dute amurrioarrek Olentzero berria.
