Eusko Jaurlaritzako Hezkuntza Sailak aurreikusi du asteazkenean itzuliko direla Lehen Hezkuntzako ikasleak Mendiko Eskolara. Izan ere, atzo haize ufadek teilatuaren zati bat erauzi zuten eta klaseak bertan behera geratu dira gaur eta bihar ere horrela jarraituko dute. Gauzak hala, gaur eta bihar 2, 3 eta 4 urteko ikasleak soilik joango dira klasera
Hezkuntza arduradunek azaldu dutenez, bihar lanak egongo dira zentroan solte geratu diren elementuak erretiratzeko eta segurtasuna bermatzeko. Espero dute, behin hori eginda, langileek eta ikasleek (280 lagun guztira) arriskurik gabe bueltatzea ohiko jarduerara asteazkenean bertan.
Bi asteko esku-hartzea
Eusko Jaurlaritzak adierazi du konponketek bi aste iraungo dutela eta eskerrak eman dizkie familiei eta ikastetxeko beharginei, salbuespenezko egoera horretan ulertu eta laguntzeagatik.
Erakunde publikoek azaldu dute Eusko Jaurlaritzako Hezkuntza Sailak, Amurrioko Udalak eta ikastetxeko zuzendaritzak koordinazio bilera egin dutela, gertaeraren jarraipena egiteko, jarduerak koordinatzeko eta normaltasunera ahalik eta baldintzarik onenetan itzultzea ziurtatzeko.
