Azaroaren 26an osatutako Aiaraldeko Garapen Industrialaren aldeko Mahaiaren bigarren bilera egin dute gaur Amurrioko Refor Enpresaldean. Duela bi hilabete egin bezala, bilkuraren atarian mobilizazioa eta agerraldia egin dituzte Maderas de Llodioko langileek, dagoeneko 129 egunez luzatu den lan gatazkaren konponbidea eskatzeko.
Garnica konpainiak negoziazio prozesua "aldebakarrez" hautsi izana salatu dute Laudioko grebalariek, lan gatazka "are gehiago larriagotuz". "Langileon ustez, erabaki hau, enpresaren erabateko arduragabekeria da. Baina, era berean, salatu nahi dugu erakundeen inplikazio falta ere, Aiaraldearen etorkizunaz hitz egiten baitute, baina ez diete heltzen langileen benetako eta oraingo arazoei", aldarrikatu dute agerraldian irakurritako adierazpenean. Bide horretan, "enpresari arduraz jokatzea" eskatu diote, eta "negoziazioari berriro ekin diezaiola".
Halaber, erakunde publikoei ere luzatu diete egoera bideratzeko deia. Aiaraldeko Garapen Industrialaren aldeko Mahaiaren bilera probestuz, gutun bana entregatu diete Industria eta Enplegu Sailei eta Arabako Foru Aldundiari. Maderas de Llodio fabrikaren etorkizuna bermatzeko beharrezko baliabide guztiak jartzea eskatu diete.
Eskualdeari deia
Aiaraldeko herritarrei ere luzatu diete greba mugagabeari eta langile borrokari babesa ematen jarraitzeko deia, "eskualdeko enpleguaren eta etorkizunaren alde". Ostegun honetan (urtarrilak 29) eskualdeko manifestazioa deitu dute, 18:00etan Laudioko Herriko Plazatik abiatuta.
