Urtebete igaro da Amurrioko udal langileek protestak abiatu zituztenetik. Hori dela eta, elkarretaratze berezia egin zuten iragan ostiralean, astero egiten duten protesta dinamikaren barruan. Bertan salatu zutenez, 375 egun igaro dira “Amurrioko Udalak eta bere alkateak udal langileek hautatutako komitearekin ezer ere negoziatu gabe”.
Urtebete honetan erabakiak “alde bakarrez” hartu izana leporatu diote beharginen ordezkariek gobernuburuari. Salatu dutenez, “berak hautatutako langile gutxi batzuei soldata igo” die alkateak, “lanpostuen baloraziorik egin gabe”.
Era berean, gogora ekarri dute Amurrioko Udalak uko egin ziola Arartekoak udazkenean luzatutako gomendioa bere osotasunean betetzeari.
Horren aurrean, “kontziliazio neurriak arautzea” eskatu diote alkateari, “langileek propio berari mesederik eskatu behar ez izateko”. Aurrejubilazioak saritzea ere eskatu dute, “hainbat udalek eta Aldundi guztiek” hala egiten dutela nabarmenduta.
Horri lotuta, langile guztiak berdin tratatzea ere eskatu diote Udalari, eta baita “udal langileen %74ak sinatutako aldarrikapen plataforma negoziatzea”. Izan ere, Enpresa Batzordeko kideek salatu dute hiru aldiz erregistratu dutela horretarako eskaera, “azkena pasa den ostiralean”.
Zehaztu dutenez, legeak ebazten du Negoziazio Mahaia hilabeteko epean aktibatu beharko litzatekeela, eta tokiko erakundeak ez duela halakorik egin. Gauzak hala, Arartekoan salatu dute hori ere.
Alkatearen jarrera deitoratu dute batzordeko kideek, “demokratikoa ez dela” iritzita. Era berean, gaineratu dute ez dela “kontu politiko” bat, “Udal Gobernu Taldearen, eta bereziki alkatearen burugogorkeria bat” baizik. Izan ere, azpimarratu dutenez, EAJk eta PSE-EEk ez dute hala jokatzen “beste erakundeetan”.
Gauzak hala, “fede onez negoziatzeko eskaera” luzatu diete Udalari eta alkateari, “jarrera eraikitzaile batetik”.