Urte hasieran jakinarazi zuen Lukene Trujillano txirrindulari amurrioarrak crowfundinga abiatu zuela bere osasun arazoei aurre egiteko. Izan ere, gazteak uste du arteria iliakoaren endofibrosia duela, eta diagnostikoa zein ebakuntza izatera Belgikara jo behar zuen otsailean.
Zorionez, egoera guztiz irauli da azken asteetan. Osasungintza publikoak Logroñoko mediku aditu batera bideratu zuen, baina hiru hilabetez bere kasuak ez zuen aurrera egin. Ordea, azken asteetan Errioxan prozedurak bizkortu dituzte. "Kirofanoan egin dizkidate probak berresteko arterian kalteak daudela eta ebakuntza aurreko probak egiteko ere deitu didate hurrengo astearterako. Hiru hilabetetan ez dut inongo berririk izan, baina orain hori aldatu da".
Gauzak horrela, Trujillanok erabaki zaila hartu behar izan du. Edo osasungintza publikoaren bidea hartzea edo Belgikara joatea, non duela hilabete bat hartu baitzuen hitzordua tratamendua jasotzeko.
Azkenean, amurrioarrari iruditu zaio koherenteena dela crowfundingean bildutako dirua itzultzea eta osasun sistema publikoaren alde egitea. "Dirua jarri duen jende guztiarekin oso eskertuta nago eta litekeena da Belgikan apur bat aurreratuagoak egotea, baina uste dut aukerarik zentzudunena dela osasungintza publikoa".
Buruhaustea izan bada ere, gazteak ez du uste crowfundinga abiatzea denbora galtzea izan denik. Izan ere, arteria iliakoaren endofibrosia zer den ikusarazteko balio izan du eta, bide batez, mahairatu ez dela soilik kirolari profesionalen gaitza arriskutsua.