Tubos Reunidos konpainiak iragarritako kaleratzeen aurrean, ESK eta LAB sindikatuek adierazpen publikoak egin dituzte ziurtatzeko ez dutela enplegu suntsipenarik onartuko. Euren webgune eta sare sozialetan zabaldutako mezuetan, langile erakundeek kritika partekatuak egin dituzte.
Alde batetik, azpimarratu dute enpresak dirulagunza oso oparoak jaso dituela SEPI zein ICO funtsei esker, eta merkatuaren egoera txar puntuala (Donald Trump presidente estatubatuarrak ezarritako muga-zergek eragindakoa) baliatu nahi duela langile kopurua murrizteko.
Multinazionalak finantzaketa publikoa jaso duen neurrian, LABek eta ESKk azpimarratu dute erakundeek ardurak hartu behar dituztela.
ESKk, gainera, azpimarratu du konpainiak beharginen langabezia bitartekoak banpirizatu dituela, hainbat erregulazio espediente abiatuta; eta, merkatu aldaketa ematen denean, azpikontrataziora joko duela utzitako hutsuneak betetzeko.
Gauzak horrela, bi sindikatuek aldarrikatu dute Aiaraldean zein Ezkerraldean eta Meatzaldean enpleguaren egoera kritikoa dela eta mobilizazioak direla bidea egoera iraultzeko eta industria etorkizuna bermatzeko.