Enpresa Batzordearekin bildu baino ordu batzuk lehenago aurreratu ditu Tubos Reunidosek bere iazko emaitzak Balore Merkatuaren Espainiako Batzordeari zuzendutako komunikatuan. Oharrean azaldu dutenez, 71,3 milioi euroko galera garbia izan du enpresak 2025ean.
Tubos Reunidosek egoera justifikatu du altzairuzko hodien sektorean dagoen "nazioarteko egoera konplexuarekin", eta bereziki AEBetako muga-zergak gogortu izanarekin. Izan ere, %50eko igoera izan zuten iazko ekainean zergek. Igoera horrek gogor jo du enpresaren merkatu nagusia, AEBek azken urteetan fakturazioaren ia erdia hartu baitute.
Gauzak hala, lehen seihilekoan 205,8 milioi euro fakturatu ondoren, bigarrenean 159,9 milioira jaitsi zen. Urte osoan, beraz, 365,7 milioi euroko salmentak izan ditu taldeak.
Dena den, kostuak kudeatzeko abian jarritako neurriak gorabehera, jardueraren beherakadak egitura-kosteak ezin bere gain hartzea ekarri du, multinazionalaren hitzetan. Horri maileguak itzultzeko ordainketak gehitu zaizkio, eta ondorioz, urteko emaitza garbia 71,3 milioi euroko galera izan da.
Konpainiaren zuzendaritza gaur goizean bilduko da Amurrioko eta Trapagako plantetako langileen ordezkariekin, iragan urtarrilaren 30ean aurreratutako EEEaren dimentsioa azaltzeko. 10:00etan izango da bilera, eta 24 orduko lanuztea egiten ari dira langileak Amurrioko lantegiaren kanpoko aldean.