Lehen Sestaon eta orain Amurrioko altzairutegian aritzen diren Tubos Reunidoseko beharginek eskutitz irekia bidali diete euren lankideak izandakoei. Gogoratu beharra dago Trapagarango lantegia hornitzen zuen altzairutegia Sestaon zegoela eta bi azpiegituren beharginek 43 eguneko greba egin zutela 2018an, enpresak 157 kaleratze eta soldataren %25eko murrizketa ezarri nahi zituelako.
Borrka ziklo horretan hainbat ekimen egin zituzten, zuzendaritzaren bulegoetara sartzea tartean:
Lanuzteekin batera, Trapagarango langileak enpresako bulegoetan sartzen saiatu ziren protesta aro horretan. Behin enplegu suntsiketa gelditu eta gero, zuzendaritzak eta langileek adostu zuten Sestaoko altzairutegia Amurriokoarekin batzea. Hain zuzen, multinazionalak atal hori guztia itxi nahi du orain, 301 kaleratzeen barruan.
Horren aurrean, Ezkerraldean kokatuta zegoen fabrikako langileek mezua zabaldu diete Trapagarango lankide ohiei, galdetzeko non dagoen 2018ko batasuna eta elkartasuna.
Izan ere, beharginek ez dute ezberdintasunik ikusten 2018ko eta 2026ko egoeren artean eta, euren iritziz, enpresa guztia dago arriskuan.
Mobilizazioa eta presio sendotzeko deia
Eskutitzaren testuingurua hobeto ulertzeko, aintzat hartu beharra dago Trapagarango lantegian soilik LAB eta ESK erakundeek deitu dituztela lanuzteak eta ELAk, UGTk eta CCOOk ez dutela ezer antolatu.
Horrek ez du esan nahi kaleratze kolektiboek eraginik izango ez dutenik, Amurrion ondorioak askoz latzagoak izango badira ere. Nahiz eta enplegu galera urriagoa izan, 27 langile gutxiagorekin jarraitu nahi du Tubos Reunidosek Trapagaranen.
Gauzak horrela, 2018an 43 greba egun partekatu zituzten eskualdeko beharginek inplikazioa exijitu dute. Halaber, ez da ahaztu behar enplegua erregulatzeko espedientea negoziatzen duen mahaiak (bi lantegiak barne) hamahiru ordezkari dituela:
- ELA: 5
- UGT: 3
- LAB: 2
- CCOO: 2
- ESK: 1
Horietako bost Trapagarangoak dira:
- ELA: 2
- UGT: 1
- CCOO: 1
- LAB: 1
Gauzak horrela, sindikatuek eta atal sindikalek hartuko dituzten jarrerak erabakigarriak izan daitezke funtsezko urratsak egiteko, espedienteari oniritzia ematea edo ukatzea, besteak beste.