ELA sindikatuak bere afiliatuei azaldu die Lan Ikuskaritzarekin otsailean egindako bileran eskatu ziotela erakundeari berrikusteko hainbat ebentualen kontratua. "Deigarria zen 40 behin-behineko kontratu, ekoizpen arrazoiengatik sinatutakoak urtarrila eta otsaila artean, martxoaren 31n amaitzea, hau da, ebentualen kolektiboaren kaleratzearekin batera. Kontratu horien arrazoia zen lan karga handitu izana, aldi baterako enplegua erregulatzeko espedientea indarrean zegoelarik eta enplegua erregulatzeko espedientea kontsulta epean egon bitartean".
ELAk oraindik ezin du zehaztu eskaera horrek eragin duen 42 eta 47 ebentualen arteko kontratuak legez kontrakotzat jotzea Lan Ikuskaritzak, baina dokumentazio osoa eskatu du.
Erakunde publikoen zorroztasuna
ESK sindikatuak, bere aldetik, erakunde publikoei exijitu die langile erakundeekin izan duten zorroztasuna. "Ez da bidezkoa enpresak legea urratu ondoren erakundeek babes hain argia ematen jarraitzea zuzendaritzari", kritikatu du ESK-k.
Korrika eta Dolumin Barikua
Espedientearen nondik norakoak argitzen diren bitartean, Tubos Reunidoseko langileek jarraitzen dute greba mugagabean eta mobilizatzen.
Hori dela eta, gauez Korrikako hiru kilometrotan egongo dira presente Aiaraldean:
- 00:29an 2.348 kilometroan hartuko dute lekukoa, Izoriako Administrazio Batzarrak eskainita.
- 00:35ean 2.349 kilometroko protagonistak izango dira, "Tubos Reunidoseko langile borrokalariak" izenean.
- 04:20an 2.398 kilometroa partekatuko dute Arakaldoko Udalarekin eta Maderas de Llodioko langileekin.
Horrez gain, bihar Dolumin Barikua dela eta, 11:00etan elkarretaratzea egingo dute Herriko plazan.