Tubos Reunidos enpresako zuzendaritzak pasa den astean komunikatu zuen 2025ean 118 milioi euroko galera metatu zuela. Adierazpena etorri zen enplegua erregulatzeko espedientearen tramitazioaren erdian eta Lan Ikuskaritzak 40 langile baino gehiagoren kontratu egoera iruzurtzat jo eta gero.
Gertakarien kate horren hurrengo urratsa izan da ELA eta ESK sindikatuen erantzuna, zeinek leporatu diote multinazionalaren arduradunei emaitzakk manipulatu izan. Zehazki, ELAk zalantzan jarri ditu enpresak 2025ari buruz aurreko ostiralean aurkeztutako azken emaitza ekonomikoak.
Sindikatuaren arabera, "ez da koherentea 2024arekin alderatuta fakturazioa nabarmen handiagoa izan den urte batean, hasieran jakinarazitakoa baino galera handiagoak agertzea".
Lehen azterketa batean, ELAk zuzendaritzaren aldetik kontabilitate ingeniaritza baten erabilera sumatzen du eta emaitzak aztertuko dituela iragarri du.
ESK-ren salaketa
ESK erakundeak ere antzeko hausnarketa egin du eta luze aritu da horri buruz. Hasteko, hiru datu azpimarratu ditu:
- 40,8 milioi “ibilgetu materialaren narriadurari” dagozkio; doikuntza kontable subjektibo bat da, enpresak une honetan aplikatzea erabaki duena bere galerak handitzeko. Ez da desagertu den dirua, eurek asmatutako zenbaki bat baizik.
- 8,3 milioi zerga geroratuen aktiboen baja direla-eta sortzen dira; beste artifizio kontable bat da, diruzaintzan inolako eraginik ez duena. Soilik esan nahi du ziurtzat jotzen zituzten abantaila fiskal batzuk galdu direla.
- Ustiapen-jardueren diru-fluxua (FCE) positiboa izan zen, 2,1 milioi eurokoa. Enpresak 31,8 milioi euroko eskudirutan itxi zuen ekitaldia. Ez dago berehalako likidezia-krisirik; badago kontuak makillatzeko erabaki bat, kaleratzeak justifikatzeko.
Salmenta gehiago, Ameriketako Estatu Batuetan ere
Langile erakundearen aldetik, ukatu dute Donald Trumpek ezarritako muga zergak egotea Tubos Reunidosek argudiatutako krisialdian. "Salmentak han %22,1 hazi ziren 2025ean, 132,9 milioitik 162,2 milioi eurora".
Hazkundea, gainera, ez da gertatu AEBn soilik: "Nzegozio-zifra osoa —enpresa batek bere produktuen salmentaren ondorioz lortutako diru-sarrera guztien adierazlea— %13 hazi da: 2024ko 324 milioi eurotik 2025eko 365,7 milioi eurora".
Halaber, ESK-k nabarmendu du enpresak 31,8 milioi zituela kutxan urte amaieran.
Gauzak horrela, bai ELAk zein ESK-k berretsi dute greba mugagabeari eutsiko diotela enplegua erregulatzeko espedientea atzera bota arte.