Tubos Reunidos eta Maderas de Llodioko beharginek A-625 errepideko trafikoa eten dute 07:30ak aldera. Greba mugagabean dauden bi enpresetako beharginek indarrak elkartu dituzte gaur 6:00ak aldera Amurrioko konpainiako lantegiko piketean eta gero errepidera jo dute.
8:15ak arte luzatu dute protesta eta ez da aparteko gatazkarik egon. Ertzaintzaren patruila bakarra bertaratu da trafikoa bideratzera.
Gaurkoa ez da Tubos Reunidoseko beharginek protesta neurri hau hartzen duten lehen aldia, duela aste batzuk errepide mozketa berdina egin baitzuten. Maderas de Llodioko grebalarien lanuzteak, bestalde, 194 egun bete ditu gaur.
Eusko Jaurlaritzako konponbidea ezerezean geratu da
Duela aste gutxi Mikel Jauregi Industria Sailburuak adierazi zuen Tubos Reunidos enpresak duen zorra berregituratzeak irtenbide berritzaileak eskatuko zituela, baina Eusko Jaurlaritzaren ideia ez da gauzatu.
Izan ere, Jauregik berak azaldu bezala, euren ideia zen Espainiako Gobernuak Irango gerrako krisialdiaren neurrien paketearen barruan sartzea SEPIko zorra ez ordaintzea, baina Pedro Sanchez buru duen kabineteak ez du halakorik jaso berriki onartutako legean.