Atzo arratsaldean plazaratu zituen Tubos Reunidosek 2025eko kontu ikuskatuak. Ernst & Young kontsultoria arduratu da lan horiek egiteaz, eta ontzat eman ditu iazko kontu ekonomikoak.
Txostenetan agertzen denaren arabera, 118 milioi euroko galera globalak ditu multinazionalak, duela aste batzuk jakinarazitakoa berretsiz.
Horren harira, Ernst & Young ikuskariak "zalantza nabarmenak" plazaratu ditu enpresak funtzionatzen jarraitzeko izan dezakeen gaitasunari dagokionez, eta Trumpen muga-zergetan jarri dute arazoaren jatorria.
"Narriaduragatiko hornidura" deritzon kontabilitate-doikuntza egin du konpainiak bere sozietate nagusian, 155,1 milioi euroko galera kalkulatuta.
Sozietate nagusiak, 160 milioi euroko galera
Egoera txarragoa da multinazionalaren sozietate nagusiaren (Tubos Reunidos S.A.) kasuan. Enpresa nagusi horrek 160 milioi euroko galerak aurkeztu ditu.
Txostenean bertan azaltzen denez, galera nagusia "narriaduragatiko hornidura" deritzon kontabilitate-doikuntzatik dator. Operazio horrekin, sozietateak "taldeko enpresetan dituen partaidetzen eta taldeari emandako maileguen balio berreskuragarria" birkalkulatu du, "haien arrazoizko balioaren arabera, merkatuko baldintza berrien arabera". Berkalkulu finantziero horretatik dator kontuetako galerarik handiena, 155,1 milioi eurokoa.
Kontu globaletan ere antzeko kalkulua egin du multinazionalak: 40,8 eta 8,4 milioi euroko galerak kalkulatu ditu, hurrenez hurren, bere ibilgetu materialaren zein zerga geroratuagatiko aktiboen hondatzeagatik, eta horrek eragin du 118 euroko emaitza ekonomiko negatiboa, “errentagarritasunaren erorketarekin” batera.
Ohikoan baino beranduago
Balore Merkatuaren Espainiako Batzordeak ezarritako epemugen barruan, baina ohikoan baino hilabete beranduago aurkeztu ditu Tubos Reunidosek iazko kontu ekonomikoak, azken lau urteetan otsailaren amaieran aurkeztu baititu.
