Zorionekoak dira Aiaraldeko metal zaleak. Maiatzaren 1ean, San Joseko jaien testuinguruan, kontzertua eskainiko du Pi L.T. talde ezagunak Amurrioko Gaztetxean. 1990eko hamarkadan rock eta metal musikan zein euskal eszenan iraultza eragin zuen Mungiako bandak. Bost disko kaleratu zituzten 1993 eta 2005 urteen bitartean. Ia bi hamarkadaz luzatu zen eten baten ondoren, 2024an itzuli ziren eszenatokietara.
Mungiarrek Cabron Dandy tokiko taldearekin elkarbanatuko dute Gaztetxeko oholtza. Luis Vil amurrioarra da Cabron Dandy taldeko abeslaria, eta maiatzaren 1eko kontzertua "mendeku txiki bat" izango dela azaldu du sare sozialetan. Izan ere, gaur egun Amurrioko Gaztetxea dena Guardia Zibilaren kuartela zen duela 40 urte, eta gaztetan bertan bizitako pasarte ilun bat ekarri du gogora sortzaile amurrioarrak kontzertuaren berri ematearekin batera: "Datorren maiatzaren 1ean zirkulu bat itxiko dut irrikaz, arantza zahar bat erauziz. 1980ko hamarkadako kuartel ilun hura gaztetxe koloretsu eta alaia da gaur egun. Ilusio handia egiten dit maiatzaren 1ean, Langile Klasearen Nazioarteko Egunean eta auzoko jaietan, agertoki horretara igotzeak, orain dela 40 urte baino gehiago ezin izan nuenari ordaina emateko, gustura geratzeko, oihu egiteko, eta, batez ere, erantzuteko".
Kontzertuak 21:30etan hasiko dira, sarrerak 12 euroko prezioa izango du eta egunean bertan erosi beharko dira.
Musika eskaintza zabala
Rock eta metal musikaz haratago, urtero bezala eskaintza zabala prestatu dute Amurrioko Gazte Asanbladako kideek auzoko jaietako egitaraua aberasteko. Apirilaren 30ean Selektha Stepik eta DJ Txatxis jarriko dute dantzan San Jose auzoko gune autogestionatua goizeko ordu txikiak arte. Maiatzaren 2an ere zabalduko dituzte Gaztetxeko ateak, 22:30etatik aurrera. Hirugarren egun horretan DJ Katiuska laudioarrak arituko dira oholtzatik giroa berotzeko lanetan. Gazte Asanbladako kideek aurreratu dutenez, beste talde bat gehiago lotzeko ahaleginetan ari dira ere, jai-giroa are gehiago zukutzeko.