Aiaraldeko Garapen Industrialaren aldeko Mahaiaren bosgarren bilera egin dute gaur Refor enpresaldean eta, aurrekoetan bezala, aukera hori baliatu dute Tubos Reunidos eta Maderas de Llodioko langileek indarrak batu eta bi enpresetan ezarri nahi dituzten kaleratzeen aurkako aldarriak zabaltzeko.
Giza katea egin dute horretarako eraikinaren ertz batetik bestera. Presentzia polizial handia egon da, baina ez da gatazkarik sortu. Mahaiko parte hartzaile batzuk langileen artetik sartu dira aparteko arazorik gabe. Beste batzuk, aldiz, Ertzaintzaren Brigada Mugikorrak atondutako beste bide bat baliatu dute giza katearekin topo ez egiteko.
Bi enpresetako grebalariek “duten erantzukizuna gogorarazi” nahi izan diete mahaian bildutako ordzkari politiko eta instituzionalei, eta “neurri erreal eta urgenteak” eskatu dizkiete kaleratzeen auziari konponbidea emateko.
“Azken asteetan Aiaraldea berriro egon da albistegietan, hainbat arrazoiengatik, baina hemen ez da ezer aldatu”, ziurtatu dute beharginek. Ohartarazi dutenez, ehunka lanpostuk jarraitzen dute suntsitzeko arriskuan, “eta erakunde publikoek, kaleratzeen erantzuleei ardurak eskatu ordez, langileon bizkarren gainean jartzen dute ardura guztia”. Horren aurrean, berriro salatu dute “Tubos Reunidos eta Garnicako zuzendaritzek” sortu dutela arazoa, eta eurei eskatu behar zaizkiela “ardurak eta konpromisoak”.
Bien bitartean, borrokan jarraituko dutela ziurtatu dute. Aste honetan hainbat elkarretaratze eta mobilizazio egingo dituzte, eta SOS Aiaraldearen hurrengo bilerara gerturatzeko gonbita ere luzatu dute. Apirilaren 29an izango da zita, 19:00etan Amurrioko Kultur Etxean.