Gaur, ostiralero bezala, mobilizazioa egin dute Tubos Reunidoseko grebalariek, baina manifestazioa plazan amaitu ordez, udalbatza aretoa okupatu dute ordubetez.
Berez, langileen helburua izan da Txerra Molinuevo alkatearekin hitz egitea, baina udalburua ez zegoen gaur. Beharginen bozeramaileetako batek argitu du "haserre" daudela pasa den astean bilera egin zutelako eta Molinuevok ez zielako Bruselako batzarraren berri eman. "Horrelako hitzorduak ez dira egun batetik bestera egiten", aipatu du sindikatu bateko kideak.
Grebalariek erantsi dute alkateak aipatu zuela hedabidetan Europar Batzordearekin izandako elkarrizketa "emankorra" izan zela, baina ez dela beharginekin harremanetan jarri. "Entzuten dugu oso larrituak daudela Tubos Reunidosen egoera dela eta, baina jende ororekin hitz egiten dute, gurekin izan ezik", salatu dute grebalariek.
Udalbatza aretoa okupatu eta gero, udal gobernu taldeko beste kide batekin mintzatu dira eta adostu dute hurrengo astean bilera egingo dutela, zinegotzi horrek ez baitzuen Europar Batzordeari buruzko informaziorik.
Esan bezala, ordubeteko protestaren ostean, Amurrioko Udaletxea utzi dute Tubos Reunidoseko langileek.