Goiz gorabeheratsua izan dute gaur Tubos Reunidoseko langileen ordezkariek, bi bilera garrantzitsu izan baitituzte. Lehenengoa Bilbon gertatu da, multinazionalaren bulegoetan. Hara jo dute ELA, LAB, UGT, ESK eta CNTko ordezkariek hitzordurik gabe eta Carlos Lopez de las Heras CEOarekin eta zuzendaritzako beste kideekin hitz egitea lortu dute, ezustean.
Sindikatuetako kideek idazkia eman diete multinazionaleko buruei bilera bat dei dezaten eta elkarrizketa izan dute eurekin. Horretan argi geratu da konpainiaren asmoa dela aurrera egitea enplegua erregulatzeko espedientearekin eta iragarritako neurrekin eta eztabaida jazo da bi aldeen artean. Izan ere enpresak duen zorra da egoeraren muina sindikatuentzat. Zuzendaritzak, aldiz, defendatu du enpresak egiturazko arazoa duela.
Hala ere, langileen bozeramaileek azpimarratu dute, gutxienez, aurrez aurre hitz egitera eseri behar dutela bi aldeek.
Solasaldiaren beste ardatzetako bat izan da hedabide batek argitaratu duen albistea, zeinean aipatu duen Administrazio Kontseilua hartzekodunen konkurtsoa prestatzen ari dela. Lopez de las Herasek erantzun du berak ez dakiela ezer horri buruz eta gosaltzen zuen bitartean izan duela horren berri.
Hartzekodunen konkurtsoa
Solasaldiaren beste ardatzetako bat izan da hedabide batek argitaratu duen albistea, zeinean aipatu duen Administrazio Kontseilua hartzekodunen konkurtsoa prestatzen ari dela. Lopez de las Herasek erantzun du berak ez dakiela ezer horri buruz eta gosaltzen zuen bitartean izan duela horren berri. Halaber, gaineratu du komunikabideek argitaratzen dutena ez diola kezkarik sortzen.
Jose Antonio Jainagarekin (Sidenorreko buruarekin) bilerarik egin izana ere ukatu dute zuzendaritzako kideek.
Beharginen ordezkariek idazkia eman diote Lopez de la Herasi eta CEOak sinatu du, ziurtatzeko jaso duela. Sindikatuek espero dute bilera formala egiteko deia jasotzea laster.
Amurrioko alkatea
Eguerdian, ordea, Txerra Molinuevo alkatearekin eta udalbatzan ordezkaritza duten alderdiekien elkartu dira sindikatuetako kideak. Batzar horretan Molinuevok barkamena eskatu die ez jakinarazteagatik Bruselara joango zela eta han aurkeztutako dokumentazioa eman die.
Alkateak azaldu du EAJko Europar Parlamentuko taldearen bitartez bilera eskatu zutela Industria Batzordearekin hiru bide aztertzeko. Helburua izan zen Europar Batasunaren araudiaren 107. artikulua baliatzea, Tubos Reunidos enpresa estrategikotzat jo dezaten eta, ondorioz, finantzaziorako aukerak aztertu edota SEPIko zorra kentzeko parada emateko.
Hirugarren aukera langile kaleratuentzako trebakuntza sustatzeko dirua lortzea litzateke.
Molinuevok argitu du "emankortzat" jo zuela bilera, herri txiki batek Europar Batzordearen arreta jaso duelako.
Aurrera begira, alkateak esan du Eusko Jaurlaritzari eskatuko diola ahalbidetzea batzar bat SEPIren eta grebalarien artean. Horrez gain, konpromisoa hartu du Europatik heltzen den informazioa eurekin partekatzeko.