Asteartero bezala, Ramiro Gonzalez Arabako Ahaldun Nagusiak Foru Kontseiluan onartutako gaiei buruzko prentsaurrekoa eskaini du eta hedabideek aukera baliatu dute Tubos Reunidoseko egoerari buruz galdetzeko.
Lehenik eta behin, hartzekodunen konkurtso boluntarioari buruz itaundu diote eta Gonzalezek ez du ukatu konpainia ataka oso larrian dagoela.
Hala ere, bere ustez, prozesu berri horretan aukerak daude zorraren berregituraketa egiteko eta inbertitzaile berrien sarrera ahalbidetzeko. Ahaldunaren iritziz, bi baldintza horiek dira beharrezkoak enpresa proiektuak aurrera egin dezan: "Tubos Reunidosek jarraitzea da lehentasunezko helburua guztiontzat".
Horrez gain, kazetariek mahairatu dute ostegunean egin behar den batzarra eta galdeketa grebari buruz. Gonzalezen iritziz, "langileak kontziente dira enpresaren jarraikortasuna dela lehentasuna eta horri erantzuten dio ekimenak".
Halaber, Ahaldun Nagusiak adierazi du sinadurak legezkoak izanik (zenbait hedabidek argitaratu dute Lan Ikuskaritzak oniritzia eman diela) langileen eskubidea dela bozkatzea. "Horrela ahalbidetuko litzateke jakitea langileek zer pentsatzen duten", nabarmendu du.
Ramiro Gonzalezek argudiatu du elkarrizketa sozialerako aukera dela. Dena den, Langile Batzordearen iritzia errespetatzen duela ere azaldu du.