ELA, LAB eta ESK sindikatuek oharra plazaratu dute azpimarratzeko Tubos Reunidoseko zuzendaritzak ez diela informaziorik eskaini hartzekodunen konkurtsoari dagokionez. Konpromiso hori adierazi zien enpresako ordezkaritzak pasa den astean.
Dena den, astebete igarota, Enpresa Batzordeak ez dauka inolako berririk. "ELAk, LABek eta ESK-k berriro egiaztatu dute zuzendaritzak ez duela gardentasunik, zorroztasunik eta seriotasunik prozesu honetan guztian. Enplegu erregulazioko espedientearen kudeaketa zentzugabekeria hutsa izan da. Enpresaren kudeaketa ere arduragabea eta erruduna izan da 2008. urtetik. Tubos Reunidoseko zuzendaritza eta haren akziodunak dira enpresaren konkurtso egoeraren erantzule bakarrak".
Langile batzarra ostiralean
Gauzak horrela, sindikatuek azaldu dute ostiralean bilera deitu dutela langile ororekin. Momentuz, afiliatuekin ari dira aztertzen zein urrats egin eta ostiralean balorazioa eta proposamenak partekatuko dituzte, fase berri honi aurre egiteko behar diren erabakiak kolektiboki hartu ahal izateko.