Dozenaka lagun bildu dira Amurrioko Emakumeon* Sareak deitutako elkarretaratzean. Bi emakume herriko kaleetan jazarriak izan direla salatu dute bertan.
Indarkeria matxistak bizitzak baldintzatzen dituela gogorarazi dute protestan. Horren aurrean, "aske bizitzeko eskubidea" aldarrikatu dute, "zapalkuntza patriarkaletik kanpoko bizitza bizigarriak" nahi dituztela nabarmenduta.
Horrez gain, ohartarazi dute indarkeria matxistak "hamaika aurpegi" dituela: "indarkeria matxista da emakumeon* diru iturriak kontrolatzea, indarkeria matxista da kaletik begiradarekin akosatzea, indarkeria matxista da eraso bat salatzen dugun bakoitzeko gure hitza zalantzan jartzea, indarkeria matxista da gizonen arteko aliantzak eraikitzen eta sostengatzen jarraitzea eta hartu beharreko ardurei entzungor egitea, eta indarkeria matxista dira egunero pairatzen ditugun adibide gehiagoren zerrenda amaigabe bat, zoritxarrez".
"Egungo instituzioen pasibotasuna" eta "jendartearen konplizitatea" ere jarri dituzte jo-puntuan, erasoek jarraitzearen eragileak direla argudiatuta. Horregatik, beste behin eskatu dute indarkeria matxista "lehen mailako arazo sozial eta politikotzat" hartua izatea.
Bukatzeko, "autodefentsa feministarako deia" ere zabaldu dute, "erantzun kolektiboak artikulatzeko prest" daudela gaineratuta. Gauzak hala, mugimendu feministara jotzeko deia luzatu dute horrelako beste erasoen berri izanez gero.
Argazkiak: Amurrioko Emakumeon* Sarea