Enpresa batzordeko gehiengo sindikalarekin kritikoa den langile taldeak, iragan maiatzaren 7ko asanblada eta bozketa antolatzeko sortutako Hitza da Bidea Telegram kanala baliatu du hausnarketa elkarbanatzeko.
Lan egitearen aldeko mezua
Alarma piztu du Hitza da Bidea taldeak, administrari konkurtsalak duela astebete iragarritakoaren kontra, "nominak ziurtatuta ez daudela" adieraziz.
Horren aurrean "egunero ekoitzi behar dela" aldarrikatu dute; "egunero eta txanda guztietan". Izan ere, Telegram kanalean zabaldutako oharrean azaldutakoaren arabera, azken bi hilabeteetan erabat hustu da enpresaren kutxa, "greba mugagabeak eragindako etenaren ondorioz".
Bajarik ez eta norberaren aukerako egunik ez
"Lan egitearen aldeko mezua" zabaldu dute kanal horretan, administrari konkurtsalari enpresaren aldeko konpromisoa erakutsi asmoz: "Fakturatu egin behar da dirua sortzeko. Bizirik iraun nahi dugula erakutsi behar dugu. Ez dago aldi baterako langilerik bajak betetzeko, ezta norberaren aukerako egunak betetzeko ere... Bezeroak eta hornitzaileak berreskuratu behar dira. Hartzekodunen konkurtsoan egoteak asko uxatu ditu".
Finean, langileei bajarik eta norberaren aukerako egunak ez hartzeko exijitu diete beharginei.
"Sakrifizioak egiteko unea"
"Grebak arazo guztiak konpontzeko balio ez duela" aldarrikatu dute gehiengo sindikalaren aurka agertu ziren langileek. Tubos Reunidosek bizi duen egoeraren aurrean "sakrifizioak" egitea ezinbestekotzat jo dute, enpresaren etorkizuna bermatu ahal izateko.
Izan ere, enpresa salgai dagoela azpimarratu dute, eta horrek eszenatokia erabat aldatzen du Hitza da Bidea taldearen atzean dauden langileen iritziz: "Erosle industrial bat behar dugu, ez funts-putre bat. Dirua sortzeko gai izatea da gure aurkezpen-txartelik onena. Hartzekodunen konkurtsoa ez da garaipen bat, ezta aukera bat ere, zorigaitza da. Konkurtsotik atera daiteke, baina ezer ez da berdina izango. Etorkizunean bizirik dirauena, guk lortu beharko dugu lan eginez".
Enpresaren disoluzioa oso gertu egon daitekeela ohartarazi dute. Pareko egoeran egon diren inguruko enpresetatik ikastearen beharra aldarrikatu dute hartzekodunen konkurtsoak sortutako egoera irauli ahal izateko.