Amurrioko Gazte Asanbladak, belaunaldien arteko hariari tiraka, XIX. Gazte Eguna antolatuko du larunbatean, "Hari beretik" lemapean. Herriko gazteak elkartu eta aisialdi eredu autogestionatu baten aldeko apustuan berretsiko dira berriro ere.
Egun osoko egitaraua prestatu dute horretarako. Goizeko hamarretatik hasita gazte sortzaileen azoka egingo dute Elexondo pasealekuan eta 11:30ean, aldiz, graffiti txapelketa Juan Urrutia Plazan.
Bazkariko tiketak erosteko azken eguna
Herri bazkaria izango da eguneko beste mugarrietako bat. Juan Urrutia plazan egingo dute hau ere eta bazkalostea laguntzeko bingo musikatua eta "mojitada" prestatu dituzte.
Gaur (ekainak 10) da bazkariko tiketak erosteko azken eguna. Txartelak Txokogorri tabernan eskuratu daitezke 14 euroren truke. Bazkariko tiketekin batera gazte eguneko kamiseta, bingo musikaturako kartoia eta 13:00etan egingo duten poteorako deskontua eskainiko dutela iragarri dute Gazte Asanbladako kideek.
Musika eskaintza
Kontzertuak izango dira XIX. Gazte Eguneko protagonista nagusiak. 22:00etatik hasita Errekada, Kiliki eta Xaukena Xauk igoko dira plazako oholtzara.
Errekada talde amurrioarrak Cuatro Bancos proiektuaren lekukoa hartu du berriki, oraingoan hardcorea ardatz.
Kiliki izango da kartelburua. Beñat Rodrigo Chill Mafia taldeko abeslari ohiak bakarkako bideari ekin dio. 2025ean argitaratu zuen bere bakarkako lehen EPa: Iltze 1.
Jai-giroa luzatzearen ardura Xaukena Xauk bikotearena izango da. Xaukena Xauk-ek eskarmentua dauka Gazte Asanbladak antolatutako kontzertu eta jaiak girotzen. Urtarrilean izan ziren azkenekoz Amurrion, Gaztetxearen XII. urteurrenean.