Urtero bezala, ehunka lagun erakarri ditu Otsemeakek antolatutako akelarreak. Dantza, musika eta antzerkia baliatu dituzte talde feministako kideek emakumeek bizitzako etapa ezberdinetan pairatzen dituzten zapalkuntzak salatzeko. Modu horretan, hainbat gai jarri dituzte mahai gainean: txikitan esleitutako genero-rolak, sare sozialetako algoritmoen jazarpena, lan munduan sortzen diren arrakalak edota nagusien zaintza lanak, besteak beste.
Bukatzeko, "faxismoaren gorakadari" aurre egiteko deia luzatu zuten otsemeek, eta elkartasuna helarazi zieten munduko beste txoko batzuetan zapalduak izaten ari diren emakume guztiei. Hala ere, Amurrion bertan jazotako erasoei egin zieten azken aipamena, erasotzaileekiko jarrera konplizeak baztertzeko deia eginez.