Lau herrik osatzen dute Arrastaria eta, ondorioz, lau jai ditu markatuta bere egutegian. Apirilean dira Artomañakoak, ekainaren amaieran Delikakoak, uztailaren erdialdean Tertangakoak eta abuztuaren amaieran Aloriakoak. Festa bakoitzak bere antolakuntza eta dinamika propioa dauka, baina iaztik badago guztiak lotzen dituen jarduera bat: Arrastariako erronka.
Iazko Artomañako jaietan sortu zen ideia. “Herri bazkariaren ostean gazteen artean hasi ziren esaten erronka bat egin zitekeela herrien artean. Pentsatzen genuen ideia bertan geratuko zela, baina ez”, azaldu du Nerea Telleria tertangarrak. Delikako jaietan egin zuten lehen edizioa. Txingak, sokatira, bola-arrastea, sako lasterketa… hainbat motatako probak egiten dituzte, horietako asko herri kiroletan inspiratuak, baina bestelako trebetasunak albo batera utzi gabe: txapela jaurtiketa, iltze-sarketa, puzzle osatzea edota Arrastariari buruzko ezagutza jolasak, besteak beste. Izan ere, aniztasuna da nagusi herrietako taldeetan. “Deia egiten dugun eta ahal duena bertaratzen da. Adin guztietako jendeak parte hartu du, sei urtetatik 72 urtera”.
Delikan Delikakoek irabazi zuten iaz, Alorian ere. Artomañan, aldiz, berdinketa egon zen apirilean, eta aurtengo Delikako jaietan Aloriakoak nagusitu dira. Dena den, berdin du, ez baitute sailkapen orokorrik eramaten, helburua beste bat delako: herriak batzea. Eta lortu dutela dirudi. “Erronka egiten denean herri guztietako jendea bertaratzen da ikustera, eta polita da”.
