Amurrioko EH Bilduk oharra zabaldu du salatzeko Udal Gobernuak ez zuela jaietan eraso matxisten aurrean jarduteko protokoloa aplikatu abuztuaren 13ko "poteo ibizenco"-an gertatutakoaren aurrean.
Izan ere, azaldu dutenez egun horretan, Mugimendu Feministaren protokoloaren arduradunak "dei bat jaso" zuela azaldu du oposizioko taldeak, eta horrek "protokoloa aktibatu zuela". Subiranisten hitzetan, 24 orduko epean deitu beharko zukeen gobernu-taldeak premiazko mahaia baina "ez zion utzi Berdintasun teknikariari bere funtzioak betetzen".
Abuztuaren 16an Amurrioko Emakumeon* Sareak, Otsemeakek eta kuadrillek plazaratutako komunikatuan adierazi zutenez, "ekintza horretan erasotzaileak parte hartzekoak ziren". Jai-egitarautik kanpo bazen ere ekintzak aurrera egingo zuela ikusita, emakume erasotuek Mugimendu Feministako protokolo arduradunengana jo zutela azaldu zuten zabaldutako irakurketan, “ekintzari erantzun bat ematearen beharra” adierazteko.
Protokoloa ez-aktibatzea
Jaietan eraso matxisten aurrean jarduteko protokoloa Udalak eta jaietan parte hartzen duten bestelako eragileek prestatu zuten 2024an, hala nola Jai Herrikoien Aldeko Batzordeak, Amurrioko Kuadrillek, Amurrioko Emakumeen Sareak eta Amurrio Harro elkarteak.
Horren arabera, eta EH Bilduk argitaratutako oharrean zehaztu duenez, "erasoren bat gertatu dela egiaztatzen den guztietan, gobernu-taldeak 24 orduko epean deitu behar du premiazko mahaia, eta beste 24 ordura luzatu ahal izango da, baldin eta informazio gehiago behar bada".
Bilera hori deitzearen ardura Berdintasun teknikariarena da, eta oposizioko taldeak salatu du ez zitzaiola utzi "bere funtzioak betetzen". Horren ostean, "hiru aldiz eskatu dute jarraipen eta ebaluazio batzordeko organoa osatzen duten hainbat eragilek" mahai hori osatzea, baina momentuz ez da bilerarik egon.
"Deialdia egiteko ahalmena ez litzateke inoiz alderdi politiko baten borondatearen mende egon behar. Ez emakume erasotuak tartean daudenean. Erabaki politiko honen helburua da gertaerak denboran zehar lausotzea eta ekaitza igaro arte itxarotea, erantzun instituzional argi bat ematea saihestuz", adierazi du Jon Berganza EH Bilduk Amurrion duen bozeramaileak.
Aiaraldea Komunikabideak Amurrioko Udalari galdetu dio gaiaren inguruan, baina zehaztu du momentuz ez duela adierazpenik egingo.