Irailarekin batera badator ere kirol federatuen denboraldi hasiera eta Zaraobe Saskibaloi Taldeak lehiaketen abiapuntua jai erraldoia bilakatu nahi du. Horretarako egun osoko egitaraua prestatu du larunbatean Bañuetako inguruetan:
10:00etan kadeteen partidarekin ekingo diote eta 12:00etan klubeko taldeen aurkezpena izango da. Ekitaldi horretan eskualdeko ia alkate guztiek parte hartuko dute: Amurriokoak, Laudiokoak, Aiarakoak, Okondokoak, Urduñakoak eta Orozkoak barne Artziniegakoak ez daki aukera izango duen bertaratzeko, jaiak baitira hiribilduan).
Horrez gain, Euskadiko Saskibaloi Federazioko presidente Luis María Sautu, Enplegu, Merkataritza eta Turismo Sustapeneko eta Foru Administrazioko foru diputatu Cristina González eta Aiaraldeko Kuadrillako presidente Iñigo Pinedo Vadillo ere batuko dira.
Berdintasuna eta turismoa
Ordezkari publikoen presentziak helburu anitza izango du. Izan ere, udan bertan jakinarazi zuen saskibaloi klubak akordioa lortu duela berdintasuna -jokalari gehienak emakumezkoak dira- eta Aiaraldeko Txakolin Ibilbidea sustatzeko.
Klubeko lehen presidentea
Egungo presidentearekin batera, tartea egingo diote Marcos Marotori ere, elkarteak izan zuen lehenengo presidente izan baitzen.
Gauzak horrela, ekitaldia eguerdian hasi eta 14:00ak arte luzatuko da. Gero mokadua eskainiko dute Basarten.
Arratsaldean pintxoak dastatzeko eta musika entzuteko parada egongo da. 16:30ean mutilen senior B taldeak Ugeraga Sopelanarekin jokatuko du eta 18:45ean A taldearen ordua helduko da, Urgatziren aurka.
Azkenik, barbakoa musikatuarekin itxiko dute eguna 20:30etik aurrera eta tiketak erosteko azken eguna bihar izango da.