Ertzaintzaren eta Udaltzaingoaren aurkako margoketak agertu dira Amurrion, eta hori salatzeko komunikatuak plazaratu dituzte Amurrioko Udalak zein Esan sindikatuak. Tokiko erakundeak nabarmendu du "errespetuan, elkarrizketan eta tolerantzian oinarritutako bizikidetzaren aldeko apustua" egiten jarraituko duela.
Sindikatu polizialak, bere aldetik, "totalitario" gisa sailkatu ditu margoketak, eta berehala kentzea eta gertatutakoa ikertzea eskatu du. Horrez gain gaitzezpen "ozen eta argia" eskatu die erakunde eta arduradun politikoei.
Basarteko futbol zelaian eta Landako kalean agertu dira margoketak. Lehenak Ertzaintzari egiten dio erreferentzia, eta ez da antzeko testuinguruan egiten den lehena. Bigarrenak, aldiz, "Udaltzainak hiltzaileak" eta "Justizia Anderrentzat" dio, erreferentzia eginez Santurtzin ekainean bertako poliziak eginiko esku hartzean hildako Ander Saenz gaztearen kasuari.
