Gero eta gehiago loratzen den zinema industriak ekoiztetxe proiektu berria dauka Amurrion kokatuta. Horretarako Kevin Iglesias amurriorrak Nestor Lopez eta Pilar Sanchorekin bat egin du (Filmakers Monkeys ekimeneko kideak) Tximu Filmaken.
Gogoratu beharra dago zinema irakaslea izan ez ezik, euskal zinemako proiektu garrantzitsuetan ere parte hartu duela Iglesiasek (Jone batzuetan eta Sacamantecas) eta ekoiztetxe berriarekin sei proiektu dituzte esku artean: Nestor Lopezen Canina dokumentala eta Morder a un perro fikziozko pelikula, Principiantes filma eta Los perros, Fele Martinez antzezlearen opera prima.
Iglesiasen egitasmoaren helburuetako bat bada euskarazko ekoizpenak aurrera ateratzea. Bide horretan, Aitzol Saratxagaren Ehiza thrillera izango da lehen urratsa.
Horrez gain, Conej Goi-Goian animaziozko pelikula egingo dute. Beste dokumental bat ekoiztea ere aurreikusi dute, 24 mentiras por segundo, Javier Horcajadarena.
Sinergiak baztertu gabe Arabako Foru Aldundiaren ikus-entzunezko hubarekin
Tximu Filmak ekoiztetxeak landu nahi duen zinema aske eta anitza Amurrion kokatzeko hautua ez da ausazkoa. Izan ere, Arabako Foru Aldundiak ikus-entzunezko hub-a Maskuribai poligonoan kokatzeko proiektua dauka eta Kevin Iglesiasek Aiaraldea Komunikabideari azaldu dionez, ez du baztertzen elkarlan aukerak abiatzea egitasmo publikoarekin, bai ekoizle zein irakasle gisa, tokiko zinema industria elkar-elikatzeko eta sendotzeko.