SEPIren malgutasuna zorra kobratzeari begira ez da nahikoa Tubos Reunidosen etorkizuna bermatzeko, Ramiro Gonzalezen aburuz. Arabako Ahaldun Nagusiak prentsaurrekoa eskaini du gaur Foru Kontseiluan hartutako erabakien berri emateko eta kazetariek enpresari buruz galdetu diote.
Gonzalezek ez du zalantzarako tarterik utzi eta argi eta garbi esan du 150 milioi euroko zorra barkatzen edo berregituratzen ez bada, Tubos Reunidosen enplegu guztiak galduko direla.
Ahaldunak azaldu du inbertitzaile guztiek adierazi dutela ez dutela zorra euren gain hartuko.
Legez kontrakoa?
Zenbait hedabidek aipatu diote SEPIk zorra barkatzea legez kontrakoa litzatekela, Europar Batasunak azaldu duenez, baina Gonzalezek desadostasuna erakutsi du.
Ahaldunaren iritziz, Bruselaren erantzuna kontsulta ez loteslearen emaitza da eta bestelako adibideak daude, zeinetan bide ezberdinak jorratu dituzten: "Nik eskatzen dudana da bide eta aukera juridiko guztiak lantzea".
ESKren balorazioa
Tubos Reunidoseko ESK-ko sekzioak ere oharra plazaratu du azaltzeko enpresaren egoera larria dela. Baina, bere iritziz, "horrek ez du esan nahi itxiera saihestezina denik, ezta salmenta-prozesuak porrot egin duenik ere. Gertakariak eta hipotesiak bereizi behar dira, eta konkurtso-prozedurako berritasun bakoitza enpresa desagertzeko bidean beste urrats bat balitz bezala aurkeztea saihestu".
Sindikatuak mezu argia zabaltzeko baliatu du aukera: "Tubos Reunidos taldeak industria-instalazioak, ezagutza teknikoa, langile kualifikatuak, bezeroak eta ekoizpen-gaitasuna ditu. Industria- eta giza ondare hori babestu behar da; izan ere, ez da bideragarria Amurrioko, Trapagarango eta Langraitz Okako ekoizpen-jarduerak elkarrekin eta modu integratuan garatu gabe".
Halaber, Eusko Jaurlaritzari eskatu dio inplikazioa itxiera ekiditeko.
EH Bildu zorra kentzeko alde
EH Bilduk ere bere jarrera plazaratu du eta SEPIri eta Espainiako Gobernuari eskatu die Tubos Reunidosek duen zorra (150 milioi euro) malgutzeko edo kitatzeko bideak bilatzeko.
"Azken egunotan jakin denez, Espainiako Gobernua Europako Batzordearen txosten batean oinarritu da zorra barkatzea saihesteko, Estatuaren laguntzatzat hartuko litzatekeelako. Hala ere, beste iturri batzuen arabera, posible litzateke ordainketak atzeratzea". Egoera horren aurrean, EH Bilduk "malgutasuna" eskatu dio Espainiako Gobernuari, hiru lantegien eta langileen etorkizuna bideragarria izan dadin.