Tubos Reunidos taldearen salmenta prozesuak duen oztopo handienetako bat saihesten lagundu dezakeen albistea zabaldu da gaur. Izan ere, prozeduraren administrari konkurtsalak azaldu die sindikatuei FASEE funts publikoak komunikatu diela erraztasunak eskaintzeko prest dagoela inbertitzaileak erakartzeko, konpainia eros dezaten.
Funtsa SEPIren tresna da enpresei kaudimena ahalbidetzeko eta erakunde hori baliatu zuen erakunde publikoak 112 milioi euroko mailegua emateko.. Egun kreditu horren zorra 150 milioi euro ingurukoa da eta Tubos Reunidos taldea erosteko traba handia da interesdunentzat.
Gauzak horrela, FASEEk adierazi du prest dagoela eskaintza egin duten entitate anitzekin biltzeko eta enpresa proiektuaren jarraipena bermatuko duten baldintzak ezartzeko, malgutasunez, legea jarraituta.
Komunikazio horrekin SEPI eremu publikora atera da, taldearen erosketarako eskaintzak egin dituzten konpainiak ez uxatzeko.
Mailegua, heldulekua izatetik, arazoen iturri bilakatzera
SEPIren mailegua duela bost urte adostu zuen Tubos Reunidosek, baina heldulekua izan behar zena arazo larrien iturri bilakatu da. Alde batetik, zorra handitu duelako, baina baita ustelkeriaz ere zipriztindu duelako zuzendaritza. Hain zuzen, Guardia Zibila konpainiaren bulegoetan egon da operazioa ikertzeko eta CEOaren beraren jardueran zentratu da.