Herri batzarra egin zuten Arakaldon asteazkenean, herrian egitekoa den irisgarritasun plana aurkezteko. “Herritarren iritziak jaso eta lehentasunak zehaztea izan zen bileraren helburua”, azaldu du Jabi Asurmendik. Alkateak azaldu duenez, 13 pertsona inguru bertaratu ziren zitara, eta uneoro errespetatu zituzten COVID-19a prebenitzeko ezarritako neurriak.
Irisgarritasun plan baten ezaugarriak azaldu zituzten lehenbizi. “Jaiotzen garenetik nagusitzen garen arte irisgarritasun aldetik zer nolako mugak dauden azaldu zigun aholkulariak, oso interesgarria izan zen”.
Planteatzen diren neurriak
Udalerriko hainbat gune aztertu dituzte plana osatzeko, alkateak azaldu duenez. “Udal eraikinak eta herriko hainbat eremu aztertu dira, hainbat ikuspuntutatik: mugikortasuna, segurtasuna eta generoa”.
Modu horretan zehaztu zuten egin beharreko lehen lana: Errekatxu txokoa eta bolatokia irisgarria egitea. “Ekintza horri dagokionez jada aurreratu gara udaletik. Foru Aldundiaren diru-laguntza batera aurkeztu genuen proiektua eta eginda dago jada”, jakinarazi du Asurmendik, “Bolatokiko zuloa estaltzeko asmoa ere dugu, egurrezko xafla mugikor batzuekin, espazio guztia maila berean erabili ahal izateko”. Zeuden desnibelak kendu dituzte horretarako. Bolatokiaren zuloa estalita, eremu osoa erabilgarri bihurtzea da tokiko erakundearen asmoa.
Hainbat urte beharko dituzte obra guztiak egiteko. Herritarrek zehaztutako lehentasunen arabera arituko dira
Udal eraikina irisgarria bihurtzea da planteatutako beste erronketako bat. “Hori da, hain zuzen, herritarrek batzarrean lehentasun gisa markatu zuten ekintza”, aipatu du gobernuburuak, eta horretarako zein pausu emango dituzten azaldu du: “Sarreretako batean aldapa egingo litzateke horretarako, beste sarreran eskailerak mantenduta. Ikusmen edo mugikortasun arazoren bat duen pertsonaren bat bertaratuko balitz teknikaria batzar aretora jaitsiko litzateke, herritarrari bertan harrera egiteko”.
Oinezkoentzako tokia berreskuratzea
Oinezkoentzako lekua ere berreskuratu nahi dute, plazatik igarotzen den errepidean. Bidean hainbat ikur margotuko dituzte horretarako, “aditzera emateko oinezkoak direla toki horren jabeak eta autoak, aldiz, gonbidatuak”.
Herrian dauden hainbat bidetan ere egin nahi dituzte lanak, Asurmendik aurreratu duenez: “Toki askotan espaloiak ez dira jarraiak. Badaude gune batzuk espaloirik ez dutenak”.
Horrez gain, eserleku eta hesiren bat jarri nahi dute herrira igotzeko aldapan, oinez doazenek atsedena hartzeko aukera izan dezaten. Genero ikuspegia ere aintzat hartuko dute, herrian dauden gune ilun batzuetan obrak eginda.
Hainbat urtetako lana
Asurmendik aitortu du hainbat urte beharko dituztela planean jazotako lan guztiak aurrera ateratzeko, “aurrekontua handiegia delako Arakaldoren tamainako udal batentzat”. Gauzak hala, batzarrean zehaztutako lehentasunen arabera joango dira obrak egiten, urtez urte.