“Herri liburutegia” atondu du Arakaldoko Udalak, udaletxean. Feminismoa hizpide duten edota genero ikuspegitik idatzita dauden 100 liburu topatu daitezke bertan, Jabi Asurmendik azaldu duenez. “2.000 euroko inbertsioa egin dugu, 450 euro bideratu dira apalategiak erostera eta 1.500 liburuak erostera”, zehaztu du alkateak. Espainiako Estatuko Berdintasun Idazkaritzak esleitutako diru-laguntzaren bidez finantzatuko dute egitasmoa.
Arakaldon herri liburutegia ireki dugu, lehenengo 100 liburuak, feminismoaren inguruko irakurketak dira, euskaraz, gazteleraz, ume, gazte zein nagusientzat, eleberriak eta liburu teorikoagoak edo politikoagoak. Herritarrek liburuak hartu eta etxetik ere eraman ditzakete. Gozatu! pic.twitter.com/pI5XCTKlSE
— Jabi Asurmendi (@jabiasurmendi) July 15, 2021
Ideiaren jatorria
“Urtero egin izan dugu feminismoari lotutako ekintzaren bat. Autodefentsa feminista ikastaro bat egiten saiatu ginen, baina ez genuen gutxieneko partaide kopurua biltzea lortu, Arakaldo herri txikia delako. Gainera, COVID-19aren eragina ere hor dago”, azaldu du Asurmendik. Horregatik erabaki dute aurten, dirua ekintza bat antolatzeko baliatu ordez, liburutegia osatzera bideratzea.
Hala ere, alkateak ziurtatu du orain egin dutena ez dela ekimen puntuala izango, liburutegia ale gehiagorekin hornitzeko asmoa baitute, “etorkizun hurbil batean”. Horrez gain, herritarrei ere luzatu diete bigarren eskuko liburuak eramateko deia, proiektua bizilagun guztien artean elikatzeko.
Maileguan, nahibeste denbora
Liburuak maileguan hartzeko sistema “oso sinplea” izango da, Asurmendik zehaztu duenez. Paper bat egongo da apalaren alboan, liburu zerrendarekin. Maileguan hartzen duenak bertan jarri beharko du noiz jaso eta noiz itzultzen duen. Ez da mailegurako gehienezko denborarik ezarriko”.