Arakaldoko Jai Batzordeak proposamen bitxia egin du: aurtengo pregoilariak herriko umeak izatea. Haurrek eskaintza onartu dute, baina oraindik ez dago argi nola islatuko den aitortza. Izan ere, ez dakite eurek hartuko duten hitza edo zein eredu jarraituko duten.
Modu batean edo bestean, ostiralean 20:00etan ikusiko da herriko gazteenak protagonista izango direla ospakizunetan. "Duela bi urte herriko kirolariak izan ziren pregoia irakurtzeko ardura izan zutenak eta iaz Miren Gaztañaga antzezlea. Aurten umeei proposatu diegu eta pozik hartu dute ideia", azaldu dio batzordeko kide batek Aiaraldea Komunikabideari.
Berez, jaiak hiru egunekoak izango dira, ostiraletik igandera luzatuta. Ostiralean goizeko jarduerak egongo dira, 11:30ean kalejira egingo baitute, eta 12:00etan meza, baina ekintza gehienak, hain zuzen, txupinazoaren eskutik helduko dira, 20:00etatik aurrera.
20:15ean txorizo eta odoloste jana antolatuko dute, 20:30ean Antxon Magoaren ikuskizunak hartuko du plaza eta gero, 23:00ak arte, Zutik erromeriak girotuko du festa. Azkenik, 23:30ean, Xaiborrek alaituko du gaua.
Hiru eguneko egitarauak adin guztiak hartu ditu aintzat ekintzak eskaintzeko orduan.