aiaraldea.eus

Bihar greba egitera deitu dituzte Atxetako Dia supermerkatuko langileak

Erabiltzailearen aurpegia Erredakzioa   Ekonomia  Arrankudiaga-Zollo  Arrankudiaga-Zollo: Arrankudiaga

Bizkaia osoan egingo da greba, lan-baldintzak hobetzea eskatzeko.

Bihar greba egitera deitu dituzte Atxetako Dia supermerkatuko langileak
Abenduan bi egun egon ziren greban Dia supermerkatuetako langileak. / Ecuador Etxea | Ikusi handiago | Argazki originala

Bihar greba egitera deituak daude Atxetako Dia supermerkatuko langileak. Bizkaia osora zabalduko da ekimena, sindikatuetako ordezkariek azaldu dutenez.

Iaz bi greba egun egin zituzten supermerkatu-katean baina, langileen ordezkarien aburuz, ez ziren aski izan enpresako zuzendaritzak “gatazka konpontzeko neurri egokiak” abian jartzera bultzatzeko.

Hainbat dira langileen aldarrikapenak. Alde batetik, “etengabeko ordutegi aldaketekin” amaitzea eskatu dute, ez dutelako “bizitzarekin kontziliatzeko” balio. Horrez gain, “miseriazko soldatak” jasotzen dituztela salatu dute, “Bizkaiko lan-hitzarmenean zehaztutakoa baino baxuagoak”.

“Lanpostuen-suntsiketak” bere horretan jarraitzen duela jakinarazi dute sindikatuek. “Bajak, opor-egunak eta lanorduen murrizketak daudenean ez dira langile gehiago kontratatzen. Hori dela eta, oso lan-erritmo altuak pairatzen ditugu eta gure osasunean eragin zuzena du horrek”.

Langile gutxi daudenez, supermerkatu batetik bestera “etengabe” eta “aurretik abisatu gabe” mugitzen dituzte, langileek salatu dutenez. “Horrek eragin handia du gure eguneroko bizitzan”.

Horrez gain, lan-tresnak baldintza txarretan daudela gaineratu dute. “Gure bizitza arriskuan jartzen dute egunero”. Era berean, jakinarazi dute zuzendaritzak ez dituela aparteko lanorduetako asko aitortzen. “Gure exijentzia argia da: langile gehiago, osasun gehiago eta lan-baldintza hobeak”.

Mobilizazioa Barakaldon
Barakaldo izan da grebaren epizentroa, Diaren saltoki gehien dituen udalerria delako. Prentsaurrekoa egingo dute 10:30ean Bide Onera plazan. Mobilizazioa egingo dute gero, saltokietan pikete informatiboa egiten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa