Arrankudiaga-Zolloko Udalaren eta hainbat elkarteren artean plazaratu dute neguko oporrei begirako egitaraua. Ekintza andana egingo dute datozen asteetan herrian, eta aniztasuna izango da nagusi jardueretan.
Datorren ostegunean -abenduak 20- izango da lehen ekintza. Liburuak trukatzeko gunea atonduko dute eskolako arkupeetan, 16:15ean.
Hilaren 22an, aldiz, hainbat ekintza egongo dira herrian. Umeentzako jolas parkea eta Arrankugol ekimena egongo dira frontoian 11:30etatik aurrera. 18:00etan, aldiz, Olentzeroren bidaia zoragarria ikuskizuna taularatuko dute, toki berean. Ordu bat beranduago bolatokira mugituko dira herritarrak, bola jokoan arituko baitira bertan haur zein helduak.
Olentzero eta Maridomingi
Abenduaren 24an menditik jaitsi eta herria bisitatuko dute Olentzerok eta Maridomingik. Kalejira egingo dute 17:30ean Garondoko parketik abiatuta. Txokolate jana eta euskal preso politikoen aldeko elkarretaratzea egongo dira gero.
Ekintza ugari Txondor gaztetxean
Txondor gaztetxean ere ekintza ugari egingo dute. Abenduaren 23an inauguratuko dute antzinako argazkien erakusketa, 19:00etan.
24an, aldiz, Gabonak ospatzeko beta egongo da gaztetxean, jaia egingo baitute gaueko hamabietatik aurrera. Abenduaren 26an ere egingo dituzte ekintzak: umeentzako txapelketak egongo dira goizeko 11:00etan eta 3X3 futbito eta dardo txapelketak, aldiz, arratsaldeko 17:00etatik aurrera.
Hurrengo egunean Txikik hartuko du gaztetxeko mikrofonoa 19:30ean, bakarrizketa eskaintzeko.
Angel Egañari buruzko hitzaldia
Abenduaren 28an atzera begira jarriko dira Arrankudiaga-Zolloko bizilagunak, Angel Egañari buruzko hitzaldia eskainiko baitute Txomin Egiluz eta Markel Iturrizarrek Udaltalden, 19:30ean. 1938. urtean Valladoliden fusilatutako arrankudiagarra izan zen Egaña.
Abenduaren 29an egingo dute egitarauko azken ekintza. Eskupilota partidak egongo dira frontoian 19:00etan. Pilotari berriak aurkezteko baliatuko dute zita.