aiaraldea.eus

Kepa Barañanoren "Hi eta ni adiskide beti" liburua aurkeztuko da ostiralean Arrankudiagako gaztetxean

Erabiltzailearen aurpegia Julen Solaun   Kultura  Arrankudiaga-Zollo

Liburuaren helburuen artean, euskararen gaztelerarekiko menpekotasuna salatzea eta euskal historiaren "kontakizunaren borroka" irabaztea daudela dio idazleak.

Kepa Barañanoren "Hi eta ni adiskide beti" liburua aurkeztuko da ostiralean Arrankudiagako gaztetxean
Kepa Barañano bere liburuarekin, artxiboko irudi batean. / Aiaraldea.eus | Ikusi handiago | Argazki originala

Kepa Barañano idazle laudioarrak Hi eta ni adiskide beti eleberria aurkeztuko du ostiral honetan, azaroak 29, Arrankudiagako Txondor gaztetxean. Idazlearen arabera, eleberriaren helburu nagusietako bat Euskal Herriko historiaren “kontakizunaren borroka” irabaztea izan da: “Guk kontatu behar ditugu hemen gertatutakoak, bestela beste batzuek kontatuko dutelako; hori ezin dugu inondik inora onartu”.

Liburuaren beste xedeetako bat “euskarari prestigioa ematea” izan da, “erdararen morroi” bihurtzen ari dela uste baitu idazleak. “Euskaraz akats asko onartzen ditugu, erdaraz onartzen ez ditugunak. Eta hori zergatik? Nire ustez, euskararekiko begirune faltagatik; eta gure hizkuntzari begirunea izan behar diogu”, kritikatzen du Barañanok. Bestalde, aurkezpenean saldutako liburu guztien diru sarrerak Altsasuko presoentzat izango direla esan dute gaztetxetik, idazlearen jarrerarekin bat eginez.

Ipuin lehiaketa
Bestalde, Arrankudiaga eta Zolloko gazte asanbladak, euskararen eguna dela eta, 12 urtetik gorakoentzako ipuin lehiaketa bat antolatu du abenduan. Partaideek, antolakuntzak erraztutako helbide batera bidali beharko dituzte haien istorioak abenduaren 10a baino lehen, eta sariak Gabon-gaueko egunean banatuko dira. Baldintza bezala, antolakuntzak ipuin guztientzako hasiera finkatu du: “Gogoratzen naiz. Oroitzapen lanbroa izan arren, oraindik ere akorduan daukat. Haize-boladarekin batera etorri, eta haizea ez bezala nirekin geratu zen”.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa