Konfinamendua dela eta Arrakundiaga eta Zolloko zaintza sarea alkateak berak koordinatuko du

Udaletik bultzatuko dute laguntza sarea. / Aiaraldea.eus

Maider Biritxinaga zinegotziak “lasai egoteko” eskatu die biztanleei eta zehaztu du bi telefono daudela eskuragarri, laguntza edo informazioa behar izatekotan deitzeko. 

Arrankudiaga eta Zolloko zaintza sarea alkateak koordinatuko du telefonoaren eta Whatsapparen bidez, EH Bilduk eta EAJk larrialdi bileran erabaki dutenaren arabera. Hortaz, errolda errepasatu zutela azaldu du tokiko erakundeak, “zaintza edo laguntza beharra izan dezaketen herritarrak zehazteko”. Dagoeneko guztiekin jarri dira telefonoz harremanetan. Hortaz, “izan dezaketen laguntza beharra definitu” eta gero, laguntza sareko boluntarioek bideratuko dute lana, “segurtasun neurri guztiak zehatz erabilita”.

Maider Biritxinaga zinegotziak azaldu duenez, bilera egiteko “poster bat” sortu zuten, bertan bi telefono zenbaki jarrita, bat udaletxekoa zelarik. Bilera burutu zen arte, iniziatibaren difusioa WhatsApp bidez egin zutela gehitu du, nahiz eta orain mezua “beste sare batzuetan” ere jartzen ari direla adierazi.

Horrez gain, zaintza sarea beharko duten biztanle potentzialak zehazteko, errolda arakatu eta kasurik larrienak zehaztu zituztela esan du zinegotziak: “Jende nagusia, bakarrik bizi den jendea -alargunak batez ere-, patologiak dituztenak, mugitzeko mugaketak dituztenak eta besteren bat”. Laguntza behar ez izatekotan, deitutako pertsonei informazioa ere eskaini diete udaletik.

Zaintza sareak “boluntario anitzak” dituela adierazita, Biritxinagak “lasai egoteko” eskatu die herritarrei, eta etxean ahalik eta gehien geratzea eskatu die. Laguntza behar edo informazioa nahi izatekotan, honako hauek dira erabili beharreko telefono zenbakiak: 946 481 712 edo 663 531 973.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide