Euskal Preso Politikoen egoerari buruz eztabaidatuko dute gaur Arrankudiagako Gaztetxean Txema Matanzasek, Galder Barbadok eta Fernando Alonsok

Aiaraldean presoen alde egindako ekimen baten irudia. / Aiaraldea.eus

Txema Matanzas, Fernando Alonso eta Galder Barbado amurrioarra gonbidatu dituzte gai horri buruz aritzeko.

Euskal Preso Politikoen egoera politiko-juridikoa izenburupean, Sare Herritarrak mahai ingurua egingo du gaur 20:00etan Arrankudiagako Txondor Gaztetxean. Kolektibo horren erronkei buruz mintzatzeko, hiru preso politiko ohi gonbidatu dituzte: Txema Matanzas, Fernando Alonso eta Galder Barbado.

Txema Matanzas abokatuak 10 urte igaro zituen espetxean 18/98 makroepaiketa famatuaren ondorioz. Euskal Preso Politikoen abokatua izan zen urte luzez aurretik. Fernando Alonsok 20 urte baino gehiago bete ditu kartzelan ETAko kidea izatea egotzita. Atxilotu zutenean Egin egunkariko kazetaria zen eta hainbat libururen egilea ere bada, besteak beste ¿Por qué luchamos los vascos? edo Una flor en el juzgado.

Azkenik, Galder Barbado Bonilla amurrioarrak hartuko du hitza. Gaztea 2019an atxilotu zuten eta sei hilabetez espetxean egon ondoren, baldintzapeko askatasunean geratu zen. 2021ean epaitu zuen Entzutegi Nazionalak eta Angela Murillo epaileak 4 urteko espetxe zigorra ezarri zion. Une hauetan bere helegitearen emaitzaren zain dago eta ANkerkeria Stop! egitasmoa abian da bere egoera eta Aitor Zelaiarena salatzeko.

Hirurek eztabaidatuko dute Euskal Preso Politikoen Kolektiboari buruz, aintzat hartuta azken aldaketak -gradu moldaketak, sakabanaketa...-. Hitzaldia 20:00etan hasiko da, 19:30ean presoen aldeko elkarretaratzea egingo baitute Herriko plazan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide