Korrika egiteko eguna izan zuten atzo Arrankudiaga-Zollon. Pandemiako etenaldiaren ondotik, trail lasterketaren ekimena berreskuratu dute, eta ez edonola gainera. Izan ere, arratsaldeko proba zena, egun osoko egitarau bilakatu dute. Hain zuzen, 10:00etan txakurkrosa egin zuten bigarrenez, eta Euskadiko ligarako puntuagarria izan zen gainera. 12:30ean, berriz umeentzat krosa atondu zuten Iberlandan.
Proba nagusia, baina, 15:30ean izan zen: Arrankudiaga-Zolloko Traila. Bi ibilbide proposatu zituzten antolatzaileek, 16 kilometrokoa eta 6.5 kilometrokoa. Hala, trail luzean eta laburrean ia 200 lagunek hartu zuten parte. Antolatzaileek Aiaraldea Komunikabideari adierazi diotenez, 132 lagun elkartu zituen zirkuitu handiak, eta 66 motzak. "Txakurkrosean 90 pertsona batu dira, eta umeen txandan ia 130 lagun", azpimarratu dute. Guztira, beraz, 320 herritar baino gehiagok eman zuten izena.
Kirolariek ez ezik, kantuzaleek ere izan zuten gozatzeko parada, Inguma taldearen kalejira egon baitzen herrian barrena arratsaldean, eta Txondor gaztetxean The Ganorabakos taldearen emanaldia.