EH Bilduk eta EAJk adostu dute gaurko udal osoko bilkuran Arrankudiaga-Zollok ofizialki eskatzea UEMA Udalerri Euskaldunen Mankomunitatean sartzea.
Txutxi Ariznabarreta alkateak argitu duenez, eskaera UEMArekin landu dute azken hilabeteetan eta mankomunitateak berak animatu du herria, ikusita bere biztanleriaren %70 euskaraduna dela.
Izan ere, hori da bete behar den ezaugarri nagusia. "Udal euskara arloaren helburuetako bat UEMAn parte hartzea da" adierazi du Ariznabarretak.
Aho bateko aldeko botoarekin oniritzia eman diete erakundeko estatutuei, erabakia publiko egiteari eta urtero 6.100 euro inguruko ekarpena egiteari mankomunitatean.
Alkateak azaldu duenez, "UEMAk aholkularitza eskainiko dio Udalari. Izan ere, Arrankudiaga-Zollon bezala, beste leku batzuetan euskara jakintza handitu den arren, erabilera ez da hazi. Beste herri batzuen esperientziak partekatzeko aukera izango dugu mankomunitateko aholkulariekin".
Martxoaren 25ean UEMAk batzar orokorra egingo du Azpeitin eta Arrankudiaga-Zolloko hautagaitzarekin eta beste hiru udalerriren eskaerekin, mankomunitatea 100 kidera helduko da.
Printzipioz, egitasmoan ordezkaritza herrikoiak parte hartzea sustatuko dute. Hau da, udal ordezkari publikoak ez ezik (Txutxi Ariznabarreta EH Bildutik eta Olatz Alamillo EAJtik), Arrankudiaga-Zollon euskalgintzan aritzen direnak ere joatea nahi dute.
Aipatzekoa da Arrankudiaga-Zollo izango dela UEMAn sartuko den Aiaraldeko bigarren udalerria, Orozkok egin baitzuen 2017an.
Mendi eta baso plana
Udalbatzan aho batez onartu den beste gai garrantzitsua izan da mendi eta baso kudeaketaren plana. Dokumentu hori Bizkaiko Foru Aldundiari bidali behar diote orain eta herriko ondasun eta bitarteko naturalen kudeaketarako tresna garrantzitsua izango da.
Alde batetik, udalerriko mendi eta basoen inbentarioa da, jabegoa zehaztuta, baina, horrez gain, etorkizunean mendiak eta basoak zertara bideratuko diren ezartzen du, Arrankudiaga-Zollo ingurumena jasangarria izan dadin ekonomikoki zein ekologikoki.