Betiko Lagunak Herritar Taldeak eta Ramon Azkue elkarteak omenaldia egingo dute igandean. Ekitaldiaren helburua izango da udalerriko eta Arakaldoko Gerra Zibileko fusilatuak aitortzea; hau da, Ramon Azkue Gorostizaga, Angel Egaña Mendibil eta Gregorio Urkixu Alberdi.
Horretarako, 11:00etan meza egongo da Andra Mari parrokian eta 12:00etan tren geltokiaren ondoko futbol zelaian batuko dira, trenez etorritakoekin hilerrira jotzeko. Ordu laurden beranduago hasiko da ekitaldia Uribarri auzoan.
Amaitzeko, 13:30ean mokadua eskainiko dute Batzokian.
Fusilatuak eta omenduak
Hiru herritar izango dira omenduak igandean. Ramon Azkue Gorostizaga Kuban jaio zen 1898an eta 1937ko urriaren 15ean fusilatu zuten Santoñan. Euzko Gudarostearen antolatzaileetako bat izan zen eta herriko EAJko burua.
Angel Egaña Mendibil Otsanzarrekoa zen. 1914an jaio zen eta 1938ko ekainean hil zuten Valladoliden. Matxinada militarrean parte hartzea leporatu zioten epaitegi militar frankistek. Zehazki, Gorbeian gertatutako bataila batean parte hartzea egotzi zioten. Borroka horretan faxisten agintari bat hil zen. Berez, ez da igandekoa izango Egañak jasoko duen lehen omenaldia. Esaterako, Valladoliden beste 2.650 fusilaturekin batera oroitu zuten.
Gregorio Urkixu Alberdi, berez, Arakaldon jaio zen eta Derion erail zuten 1937ko abuztuan. Bizkaiko minoia izan zen eta Bilboko itsasontzi-espetxeak ez babesteagatik mendeku hartu zuten frankistek.
Oroimen historikoa Arrankudiaga-Zollon
Herri txikia izan arren, lan handia egin dute udalerrian Gerra Zibilaren ondorioak azaleratzeko. Artikuluak idatzi dituzte gertatutakoa kontatzeko eta 'Harrien oroimena' izeneko monolitoa ere jarri zuten herriko plazan errepresioaren lekukoa izateko.
Arakaldon, aldiz, bonbardaketen biktimak oroitzeko plaka jarri zuten: